Aqeedah wa Sunnat se Mutalliq Salaf-e-Salihieen ke Aqwaal
Date : 28.02.2023
Salaf e Saliheen ke aqwaal se hame ye samajh me aata hai ki baatil firqon se kaise bacha jaye and kaise sahi manhaj ko laazim pakda jaye.
Ek riwayat ka khulasah : Abbad bin Awwam farmate hain, hamare paas Shareeq bin Abdullah Nakhyi’ aaye toh humne unse poocha ki hamare yahan kuch aise log hain jo Mu’tazilah firqe se talluq rakhte hain (ye firqa Quran aur Hadees ko apne aql se samjhte hain, jo baat aql se takrati hai usey nahi mante) aur woh in hadeeso ka inkaar karte hain (ya uski taaweel karte hain):
- Allah taa’la aasman-e-duniya par utarta hai (Allah ka Sifat-e-Istawa ka inkar)
- Qayamat ke din Jannati Allah taa’la ka apne aakhon se deedar karenge (Deedar-e-Ilaahi ka inkar)
Jab Shareeq bin Abdullah ne ye suna toh unhone taqreeban 10 ahaadees bayan kar di, uske baad farmaya - Ham logo ne toh apna deen tabi’een ke bachhon ke zariye se liya, tabi’een ne sahabah se bayan kiya aur sahabah ne Allah ke Rasool se suna. In logo ne apna deen kahan se liya? (Imam Daraqutni, Kitab us Sifat)
Garaz, Mu’tazilah ke fitno se bachne ke liye Shareeq bin Abdullah ne hadees bayan karne ke baad deen lene ka sahi manhaj bata diya.
- Aql ka istemaal, deen ke asal source “Quran o hadees” ko samajhne me lagana chahiye, samajh aaye toh theek, nahi samajh aaye toh bhi theek. Lekin Aql ko hi source bana liya jaye aur “Quran o Hadees” ko uske taabe’ karne ki koshish ki jaye toh ye sarasar gumrahi hai aur ahle bid’at ka tareeqa hai.
Ek aur Misaal/Challenge : Imam Ibn Taymiyyah ne Misr ke Waasit naam ke ilaaqe me ek munazarah kiya jisme woh kehte hain - Kai martabah main ye keh chuka hoon ki jo shakhs in baaton me (munazarah) meri mukhalifat kar rahe hain, ki tumhare liye 3 saal ki mohlat hai ki woh khairul quroon me se kisi se koi ek harf le aayega jo meri zikr karda baaton ke khilaf hogi, toh main ussey rujoo’ kar lunga.
Magar aqeede salaf ke mukhalifeen poore mulk ke kitabon aur uske librariyon me chanbeen ke bawajood aisi koi cheez na nikal sake jo aimma e islam aur salaf ke khilaaf ho.
Yahan Imam Ibn Taymiyyah ne jo challenge kiya woh “khairul quroon” ke logo se daleel lane ke mutalliq thi. Is challenge ko mukhalifeen poora na kar sake, is liye ye baat manhaj e salaf ki sadaaqat aur haqqaniyat ki wazeh daleel hai.
Kitab ke Mua’llif Shaykh Jamaal bin Furayhan Al-Harithi ka Muqaddimah:
- Is zamane me bahut saare firqe mawjood hain aur sabhi ka dawah hai ki unka tareeqa wahi hai jo Rasulullah ka tareeqa tha, aisi soorat me har musalman ko chahiye ki woh jaane ke sahi raaste kaun sa hai, haqq ko pehchane aur pata kare ki kaun sa giroh sahi maa’no me rasulullah ke tareeqe par hai.
- Ahlul Hadees ki haqqaniyyat : Allah taa’la khud is baat ka inkar karta hai ki haqq aur sahi aqeedah ahlul hadees, ahle sunnat o aasaar ke alwa duniya me kisi aur firqe ke paas ho. Isliye kyonki inhone apna deen aur aqeedah nasl-dar-nasl / har zamane me baad walo ne apne se pehle walo se liya hai, yahan tak ki ye silsilah tabi’een tak pahuncha aur tabi’een ne sahabah se liya unhone se Rasulullah se liya hai. Ye silsila bilkul safe hai aur zalalat se paak hai, Alhamdulillah.
- Ahlul Hadees ka maa’na : Jab bhi Ahlul Hadees kaha jaye toh uska ka maa’na sirf muhaddiseen nahi hota balki qayamat tak aane wale woh sare log shamil hote hain jo apna aqeedah, apni shari’at, halaal o haraam etc. Allah ke Nabi ki sunnat me talaash karte hain.
- Abu Sulayman Abdurrahman bin Ahmad Daarani (215 H) kehte hain - Jab bhi mere jee me koi baat paida hui/koi baat khatki, maine ussey kitab o sunnat ke 2 gawah talab kiye (yaani Quran o sunnat ki daleel maangi) - Ye tareeqa bhi Manhaj e Salaf ko bayaan karti hai.
